Deputeti i Lëvizjes Vetëvendosje, Armend Muja, ka kritikuar Lidhjen Demokratike të Kosovës.

Sipas tij, LDK-ja mbron vetëm grupet e interesit dhe kësisoj, sipas tij, kjo parti politike është kontradiktore në logjikë.

“Kur qeveria ‘Kurti’ bëri Ligjin për çmimet tavan që marketet mos me i rritë çmimet sa të duan, LDK-ja e çoi në Gjykatë Kushtetuese, duke thënë se janë për ekonomi të tregut. Tash kur disa kompani do të dalin në treg të hapur të energjisë, LDK-ja thotë jo nuk bën të dalin në treg të hapur. LDK-ja është kontradiktore në logjikë, por konsistente në mbrojtjen e grupeve të interesit”, ka theksuar ai.

Ndryshe, deputetët e Lidhjes Demokratike të Kosovës (LDK), të mbështetur edhe nga deputetë të tjerë opozitarë, kanë dorëzuar sot një kërkesë zyrtare në Zyrën e Rregullatorit për Energji (ZRRE), duke kërkuar anulimin ose shtyrjen e vendimeve për largimin e rreth 1300 bizneseve nga tregu i rregulluar dhe për rritjen e çmimit të energjisë për konsumatorët familjarë.